رباعيات صلاح جاهين(الحلقه الثالثه)

ورا كل شباك ألف عين مفتوحين

و انا وانتي ماشيين يا غرامي الحزين

لو التصقنا نموت بضربة حجر

و لو افترقنا نموت متحسرين

عجبي !!!



نوح راح لحاله و الطوفان استمر

مركبنا تايهه لسه مش لاقيه بر

آه م الطوفان وآهين يا بر الأمان

إزاي تبان و الدنيا غرقانه شر

عجبي !!




علي رجلي دم .. نظرت له ما احتملت

علي إيدي دم.. سألت ليه ؟ لم وصلت

علي كتفي دم.. و حتي علي رأسي دم

أنا كلي دم .. قَتلت ؟ ..... والا اتقتلت

عجبي !!




انا كل يوم أسمع ........ فلان عذبوه

أسرح في بغداد و الجزاير واتوه

ما أعجبش م اللي يطيق بجسمه العذاب

و اعجب من اللي يطيق يعذب أخوه

عجبي !!!




ينبوع و في الحواديت أنا سمعت عنه

إنه عجيب .. و ف وسط لهاليب لكنه

شقيت كما الفرسان طريقي .. لقيت

حتى الخنازير و الكلاب شربوا منه

عجبي !!!!




يا قرص شمس ما لهش قبة سما

يا ورد من غير أرض شب و نما

يا أي معني جميل سمعنا عليه

الخلق ليه عايشين حياه مؤلمة ؟؟ !!

عجبي !!!

انا عن نفسى احب اشكرك على مواضيعك

مواضيع قيمة

علشان كدة الرد بيبقى مش كتير
عارفة لو حطيطى موضوع اى كلام هاتلاقى الرد علية كدة هو دة حال المنتدى بتاعنا