لو لم أكن مصريا لوددت أن أكون أي حاجة تانية

لو لم أكن مصريا .. لوددت أن أكون ..أى حاجة تانية"

الله يرحمك يا عم مصطفى كامل باشا .. لو كنت تعيش معنا هذا الزمان الأسود لما كنت زعقت بعلو صوتك وقلت كلمتك الشهيرة ..

ما الذى يدفع أي إنسان أن يعتز بإنتمائه لبلده؟؟ ما الذى يجعل واحد مثل حليم يشدوا بكل فخر ...

أحلف بسماها و بترابها..أحلف بالقمح وبالمصنع..أحلف بالمدنا و...الخ

هذا الإعتزاز و ذلك الفخر لابد أن يكون له سبب ..وسببه في اعتقادي هو الحب..أكيد الناس دي بتحب مصر..بتموت فيها..بتعشق سماها وهواها وترابها وناسها..والذي منه !!

لكن ليه ؟؟ ليه الناس دى بتحب مصر؟؟ ليه الست كانت بتقول:

مفيش حب كده من الباب للطاق ..متقوليش عشان اتولدت مصري يبقى لازم تحب مصر وتموت فى دباديبها..متقوليش حب من أول نظرة..لأن أكيد تاني و تالت نظرة حتخليك تغير رأيك..متقوليش حب من طرف واحد .. يعنى الطرف التانى يديك بالجزمة القديمة وانت بتصرخ .. بحبك بحبك

فى رأيي أن الحب علاقة متبادلة بين طرفين..مشاعر ماشية فى اتجاهين..يعنى لازم البلد تحبك عشان تحبها ..وبسلامتها البلد دى تحبك ازاى ؟؟؟ ..أقولك!!

تحبك يعنى ترعاك .. تهتم بيك .. بالبلدى كده تعبرك .. تحسسك إنك بني آدم لك قيمة وليك رأى..تعترف أن ليك حقوق زى ما عليك واجبات.

من حقك تأكل لقمة نضيفة من غير مبيدات ولا مسرطنات ولا تقاوي فاسدة ..من حقك تاكل رغيف عيش من غير مسامير ولا صراصير ولا بلا أزرق..



من حقك تتنفس هوا نضيف من غير هباب ولا أطران ولا دخان مصانع وكبريت ورصاص وسخام أسود منيل بستين نيله..



من حقك تلاقى مواصلة تركبها من غير بهدلة و شحططه ومرمطة وتزنيق و تلزيق وبلطجة وقلة أدب واللي مش عاجبه الباب يفوت جحش..



من حقك تلاقى شغلة شريفة من غير ذل ومهانة وفوت علينا بكرة يا سيد .. من غير كوسة ومحسوبية وأبجني تجدنى وسكة أبو زيد كلها مسالك..



من حقك لو عييت تلاقى حتة تتعالج فيها بكرامتك وتتعامل كإنسان محترم مش كأنك متسول جاي تشحت من الدكتور اللي أصلاً قرفان من نفسه ونفسه يديلك حقنة هوا عشان يخلص من أمثالك الأوباش الجرابيع..



من حقك تلاقى حد يجيبلك حقك لما يتنطط عليك حتة عيل شبه البرص مش باين من الأرض ويقولك..أنت مش عارف أنا ابن مين يا ابن ال .... ويبقى نهار أبوك أسود لو طلع أبوه ظابط و لا وزير و لا......... واللي له ضهر مينضربش على بطنه..

من حقك تتفرج على تليفزيون بلدك تحس بالفخر..تشوف مدارس بتتبنى ومصانع بتشتغل و كباري بتتفتح و مستشفيات بتتجدد و مدن بتتعمر وشباب زى الورد بيشتغل و يبني ويعمر ويضحي بعرقه ودمه.مش تشوف بلد بتتسرق..وعبارة بتتحرق..وقضاة بتنضرب..وصحفيين بتسجن..وأسعار كل يوم بتولع..والحرامية اللي سرقوا البلد إما في أوروبا أو في مارينا

[size=16]يا ترى بعد كل ده لسة مش فاهمين ليه الشباب بيسيب البلد و يهج؟؟؟

..لسة بتسألوا فين أحمد زويل و فاروق الباز و مجدى يعقوب..وغيرهم كتير و كتير؟؟...... يا ترى كل دول خونة و مجرمين و معندهمش و لاء وانتماء؟؟!!



ياترى يا عم مصطفى كامل باشا لو كنت عايش معانا .. كنت حتقول إيه ؟؟؟؟





[/size]

ايه المقالات الجامده دي ... علي رأي موسي " لو لم اكن مصريا ... كان هايبقي قشطه اوي "

الله يخليك يا مصطفى ومرسى جداااااااااااااااااا على ذوقك

وكل سنة وكل اعضاء المنتدى بخير بمناسبة عيد تحرير سيناء وشم النسيم وقرب الامتحانات

بشكر وطنيتك جدا يا دودى بس انا بطلت اسمع حاجة اغانى فيها كلام عن مصر علشان مبقتش احس باللى بيتقال
بس زى ما قوتلى مصر هى وطننا وهتفضل وطننا

كل سنة وكل الموجودين بالف خير وبقولوكو اية لا يغير الله قوم حتى يغيرو مابانفسهم فلو كل واحد بدا بنفسة من كل حاجة وعدل فيها اكيد البلد هتتغير هتقولولى انكم لو مصلحة متعطلة وعايزين تخلصوها منتدوش الراجل اى حاجة فالدرج ابسط مثال النتيجة كلة بيجرى عالفراش ويديلة الحلاوة ...... وكدة كدة النتيجة هتبان .... لكن اية مفيش صبر ولا اما يكون حدلاقدر اللة تعبان متقوليش انك مبتديش للتمرجى اى حاجة فجيبة عشان ااااااااااال اية مستعجل ومتقليش انك لما بيجيلك عمال وتبقى مديهم حقهم كامل وعشان يخلصولك بسرعة ااااااال اية تديهم دخان ومتقليش و متقليش احنا اللى عودنا اللى زى دول على الكلام دة كلة سواء بالتسرع او بالانانية اللى بقت موجودة فالمجتمع
ولو هرد على داليا
انا لو فوقت مصطفى كامل كنت هقول اكتر مناللى بيقولة ومكنتش هبقى اقل وطنية من اى حد من الزعماء على الرغم ان البلد كانت محتلة وكان الناس بتعانى اكتر مننا دلوقتى الا انه كان فيه حب وكانت الناس كلها روح وحدة ومفيش حد بيستخسر فحد حاجة

أولا كل سنة وأنتوا طيبين بمناسبة عيد تحرير سيناء أنا ما بعترفش بحاجة أسمها شم النسيم الموضوع داة جامد بس عالفكرة مصر مش هاتغير طالما موجود فيها ؟؟؟؟؟؟؟؟؟ أنتو عارفين مين وعلي رأي الشاعر الولهان (لو لم أكن مصريان لوددت أن أكون منوفيان)!!!

ميرسي يا منال موضوعك جامد كالعادة
انا مع داليا مليون المية
العيب مش في مصر العيب في الناس اللي بتبوظ الدنيا
ولو كل واحد فضل في مصر واستملار واجتهد ومهربش بره
اعتقد الناس اللي بينهبونا ويسرقونا هيختفوا من حياتنا لانهم هيلاقوا شباب بجد
دماغهم نظيفة عايزين يعملوا حاجة لبلدهم
انا عن نفسي بقؤل وباعلي صوت عندي ( لو لم اكن مصريا لوددت انا اكون مصريا
وبعدين يا منال عارفة بجد لما بسمع اغنية شرين مشربتش من نيلها والله بحس بفخر غير طبيعي للبلد دي ولوجودي فيها واني منها
وباهلها الطيبين اللي معتقدش انهم ممكن يكونوا في اي مكان تاني
ولو عايزة تعرفي قيمة البلد بجد اسالي اي حد مسافر بقاله فترة
واسمعي اغنية شادية واغاني عبد الحليم وام كلثوم
يا بنتي مصر دي بجد مهما نحكي عنها والله عمرنا مهنكفيها ومهما هنعملها برده مش هنكفيها

مصر , مصر ,مصر
يا احلي اسم في الوجود

سوري هعلق كمان تعليق اصل بصراحة لما حد بيجيب سيرة مصر مش بقدر ابطل كلام
زمان شاعرنا الجميل العظيم عمنا صلاح جاهين قال
منال ابقي ادخلي قسم الشعر واقراي القصيدة كاملة صدقيني بعدها هتحسي ان مصر دي اغللي شئ عندك

معلش طولت عليكم

اعتقدت مفيش كلامى بعد عمنا صلاح جاهين ومرسى على كلامك
يا رغدة
كلنا بنحب مصر بس الحب داة بيختلف من حد للتانى حبى لمصر انى عاوزاها اعظم بلد فى الدنيا وبنتقض كل شىء غلط علشان نفسى يتصلح مش اكتر

كلنا بنحب مصر ... واتمني ان اللي احنا فيه ده ظروف و تعدي ... و الظروف دي مش هاتعدي الا لما كل واحد في مصر يتمني التغيير الحقيقي و يحاول في تحقيقه