أنا والفسيخ وهواك........

سيداتي سادتي كله يظبط موجة راديو على قناة: الإف إخص
115.7000 من 100
حيث المرح و الهرج و التهييس و قناتنا هي أول قناة تنمي التفاهة عند الشباب وتفخر بأنها لا تقتصر فقط على الراديو بل و أيضا التلفزيون.. عشان نطبق المثل: اللى ما يشتري يتفرج
وأيضا قناتنا تقدم باقة مختارة و غير مختارة من الأغاني بهدف على كل لون يا بتسطا
والآن نترككم مع برنامج: أنا والفسيخ وهواااك.. مع أسامة سمير
*******
تحذير هام: ننصح مرضى القلب و الضغط مراجعة الطبيب قبل الإستماع.. المحطة غير مسؤلة عن أى أصابات.. كالحموضة مثلا
*******
المذيع.. عفانا الله وعفاكم: أحبائي الحَبيبة اللى بيحبه الحب.. عشان خاطر الحب.. مش عشان حاجة تانية.. موضعنا النهاردة عن: الحياء في الحب.. وده موضوع يؤرق كل شبابنا الحَبيّب ونحب ننبه على كل اللى هيتصلوا بينا البنين منهم والبنات.. أقل من 18 سنة.. على انهم يخلّوا التليفون جمبهم تحت البطانية ويتأكدوا إن كل اللى فى البيت ناموا.. عشان ياخدوا راحتهم فى الفضفضة واعرف اعملّهم انلايزيشن كويس يرضيهم ويبسطهم.... ونستقبل أول إتصال
المذيع: الووووووووو
الحبيبة: ألو إزيك يا أثامة أنا بحبك أوي اوي بجد بحبك موووووت وكان نفسى أكلمك من زمان
المذيع: فعلا.. فعلا..أنا اتحب حقيقي.. ويستدرك بعد مصمصة شفايفه وبلع ريقه: بس إحنا موضعنا إنهاردة عن الحياء في الحب إنتي متجوزة؟
الحبيبة: لأ
المذيع: مخطوبة؟
الحبيبة: توء
المذيع: مرتبطة عاطفيا؟
الحبيبة: آه
المذيع: طب يا ترى قلتيلوا بحبك؟
الحبيبة في إندهاش و إندفاع شديد: طبعا كتير بس هو مأليش خالص
المذيع: أه ممكن يكون هو بيكسف أو في أنواع من الشباب ما بيصرحش بحبه لأنه أكيد بيكون بيلعب بعواطف البنت بس أنا بشجعك على الإستمرار في العلاقة
الحبيبة: اثامة بث حاثة إني بحب واحد تاني بث الأولاني مالي عليّ حياتي
المذيع: أنا رأيي إنك تسيبي الأول و التاني و تحبي من أول و جديد بس حاولي تنقي المره دي.. باي ودلوقتي نسمع أغنية: اللي اختشوا ماتوا..............

جميله الحلقه دي ... يا تري البرنامج بييجي الساعه كام علشان اقفل الراديو في الوقت ده
شكرا علي المشاركه الجميله و مستنيين جديدك

والنبى انا مبحبش الفسيخ مفيش برنامج للرنجة بس الحلقة ريحتها ياااااى...... بس جد موضوع نيس ومستنين رنجتك .....قصدى جديدك