هو احنا شعب وحش؟

من طرف Juliet الإثنين يونيو 16, 2008 4:59 pm

مش عارفة ابتدي منين الموضوع .
بس بصراحة انا نفسي اتكلم فيه من زمان ...موضوع غريب حبتين مش قادرة اكون فيه رأي معين ...لكن مش عارفة برده ليه قررت اني اتخذ الجانب الآخر وانا بتكلم فيه .
يمكن علشان كلنا دايما بنتكلم على الجانب الحلو ..ومحدش فكر يتكلم في الجانب الوحش ...اهم حاجة في الموضوع ده انه لن يكون موضوع مكتمل إلا بتعليقاتكم ...انتظر تعليقاتكم على الموضوع .
ندخل في الموضوع ...هو شعب مصر شعب وحش ؟؟؟ سؤال مبالغ فية وممكن حد من الى بيقرا يقول اية داية الهبل داة يا منال طبعا لا ...لان شعب مصر اكيد هو شعب طيب ومسالم وغلبان لكن مش عارفة ليه فيه مشاهد بتخليني أحس في اوقات كتير ان شعبنا مش شعب طيب وبحس ساعات إن احنا بنهجص على بعض لما نقول اننا شعب طيب استنوا ما تردوش دلوقتي خليني اقول حبة مشاهد وبعدين نرد سوا .
المشهد الأول :
هو ليه كل ما تحصل ازمة في البلد نلاقي الكل بيحاول يتربح من هذه الأزمة ...يعني مثلا لما انفلوانزا الطيور ظهرت ..ليه تجار اللحمة والسمك غلوا الأسعار ؟؟ واحد حيقولي العرض والطلب ...اقوله رغم اني مش شايفة ان للعرض والطلب دور في الموضوع ده المسألة مسألة جشع وطمع لكن ما دمت مصر على رأيك ادخل على مشهد 2
المشهد الثاني :
سعر السكر غلى ..اكيد كل تاجر عنده مخزون شاريه بالسعر الرخيص ...طيب ليه محدش فكر يبيع اللي شاريه بالسعر الرخيص بتمن رخيص ولما يشتري البضاعة الغالية يبيعها بالغالي ...مش ده استغلال ...واحد حيقولي حالات فردية ..بس انا لما قريت عرفت انهم 2 مليون بقال واكيد دى مش حالة فردية ولا اية...طيب ادخل على مشهد تلاتة .
المشهد الثالث :
ليه في كل مصلحة وفي كل هيئة لازم علشان تحرك نفسك لازم تدفع فلوس ..؟؟ انا عمري فعلا ما دخلت مصلحة حكومية إلا ولقيت اللي بيطلب فلوس . ... وكلهم رافعين شعار( ابجنى. تجدنى)
المشهد الرابع :
عمليات النصب اللي اصبحت شيء شبه يومي في حياتنا ..كل دي عمليات نصب ...تقريبا عشرات أللآلاف من عمليات النصب حدثت في الفترة الأخيرة .
المشهد الخامس :
واحد راكب الاتوبوبيس وبعدين يقع منه الموبايل ...يتصل يلاقي اللي لقى الموبايل طمع فيه وخده ورمى الشريحة ...وداة باءة انا شوفتة بعينى.
المشهد السادس :
مشهد لصوص الأحذية المنتشرين في المساجد بطريقة بشعة ..لدرجة انه اصبح من النصائح المتكررة لو معاك جذمة جديدة لازم تحطها قدامك في الجامع يا إما حتتسرق .
المشهد السابع :
مشهد الناس اللي عندها صناديق القمامة منتشرة في كل مكان في الشارع ومع كده بيرموا زبالتهم في الأرض كل ما اشيل قشرة موز من الشارع افضل اسأل نفسي يعني ال ( ......) اللي رمى الموزة دي مش عارف انها ممكن تكسر رجل بني آدم لو داس عليها ؟؟؟ اكيد عارف طيب بيرميها ليه في نص الشارع ..حاجة تخنق .
المشهد الثامن :
مشهد الأعمى اللي ماشي في الشارع وعمال يتخبط في السكة وما حدش بيفكر يمسك ايده يوصله .
المشهد التاسع :
سواقين الاتوبيس اللي بيرفعوا سعر الأجرة وقت الضغط ويقسموا الخط اجزاء علشان ياخد الأجرة الضعف(مثلا الخط من شبين لبركة السبع) ..ما حدش بقى يقولي دول قلة ...انا اعتقد ان مصر فيها مالا يقل عن ربع مليون سواق اتوبيس ..متهيألي اللي ما بيعملش فيهم كده ممكن يكون اتنين .
المشهد العاشر :
مشهد المستغلين للسائح من اول البياع اللي بيبعله الحاجة باضعاف تمنها ..لغاية المتسول اللي يفضل قارفه في عيشته ...مرورا بسواق التاكسي وعامل الفندق الغتت والعيال الصيع اللي بيعاكسوا وبيتحرشوا ببناتهم . ..على فكرة الكتب اللي بتدي الأرشادات عن مصر للسياح بتحذرهم من المتحرشين جنسيا والبياعين المستغلين ...يا فضيحتنا .
المشهد الحادي عشر : :
مشهد معدومي الشرف و الشهامة اللي بيعاكسوا البنات في الشوارع واللي بيتلزقوا في الأتوبيسات واللي بيتحرشوا في الشوارع انا اظن ان مفيش بنت ما عانتش من المصايب دي ...ده كفاية فضيحة اللي خرجوا يحتفلوا بكأس الأمم ...الجرايد رصدت اكثر من حالة تحرش بالفتيات خلال هذه المظاهرات التي كانت تهجم على أي سيارة فيها فتيات وتحاول التحرش جنسيا بهم ...ونشر عن الموضوع ده اكتر من جريدة مثل الدستور والمصري اليوم .
كفاية كده لكن انا عندي عشرات المشاهد من دي و اكتر ....مش عارفة انا فعلا مش قادرة اني اكون رأي في الموضوع ده ..هل احنا شعب وحش ؟؟؟ هل الكلام اللي بيتقال اننا شعب طيب وغلبان وفي حاله كلها عبارات أي كلام ومالهاش معنى ؟؟ وإن كل طيبتنا متمثلة في الطيبة مع ولي الأمر اللي ما نقدرش نقول بم عليه .
ولا دي حالات فردية وظواهر موجودة في أي مجتمع واني مزودها شوية وان الأصل في الشعب ده انه شعب طيب وغلبان بجد بس الظروف هي اللي فرضت عليه كده
انا مستني تعليقاتكم ...سواء بالنقد او بالتأيد ...

من طرف mug الثلاثاء يونيو 17, 2008 4:00 am

ما نئدرش نعمم الحكم
ع اكتر من 80 مليون ونقول
دول كويسين والةلا
كل واحد بتفكيرة واتجاهاتة
احنا من جوانا كويس بس ضغط الحياة
خلى ع المعدن الكويس دا شوية تراب
لازم يتمسحوا
وبيظهر بجد وانتى اكيد شفتية فى وقت الازمات
بصى بجد بلدنا فيها مليون تعقيدة فى كل حاجة
وبالذات الروتين
والروتين نمط للاداء الحكومى وطبعا اكتسبة الموظفين
فقبل لما مثلانحساب الموظف ع ان شغلة وحش
ارجعى بكل حاجة لورا شوية وفكرى فيها
القوانين ال احنا شغلين بيها من سنة كام
الموظف دا بياخد مرتب اد اية
لازم يكون عندنا نظرة شاملة اكتر للموضوع
والسؤال دا هيفضل نئولة
احنا كويسين والة وحشين؟

من طرف Admin الثلاثاء يونيو 17, 2008 7:52 am

و الله انا شايف اننا من جوانا كويسين ... بس الناس اتخنقوا فقر و اسعار و مفيش شغل و فضائيات بتعرض افلام تافهه ومالهاش اي علاقه بالواقع دا غير المهازل اللي بتحصل فيها ... دلوقت بقي اللي بيقدر ياخد حاجه بياخدها حتي لو علي حساب حد تاني ..
انا شايف اننا كنا كويسين و ان شاء الله اتمني اننا نبقي كويسين

من طرف doda السبت يونيو 21, 2008 4:25 pm

لو مكنش فينا الكويس مكنتيش هتبقي أنتي موجودة وانا وغيرنااا كتير الي نفسهم يغيروا من المشاهد دي
أنتي فاتك مشاهد كتير

فاتك مشهد الغني الي بيذل الفقير ويأخد حقه وتلاقي الفقير وهو مروح في المواصلات بيرفع عينه للسماء ويقول حسبي الله ونعم الوكيل

فاتك مشهد الكوسة الي ماشية في البلد

فاتك المعيدين الي مع احترامي لبعضهم مبيفهموش حاجة وبحس اننا بنفهم أحسن منهم

فاتك مشهد أطفال الشوارع الي بدل ما نشلهم من الي هما فيه بنساعدهم أنهم يستمروا

فاتك مشهد قاعدات المصاطب بتاعت الستات الي في شارعكوا وهما بيجيبوا في سيرة كل أهل الحتة
ومش بعيد بيكونوا بيشتموا في بعض من وراء بعض

فاتك مشهد الشباب الي مبيصدقوا يعرفوا رقم أي بنت أو إيميلها ويوزعوا علي بعض بغض النظر هي كويسة ولا وحشة وبيبقي كل ذنبها أنها صدقت تمثيل واحد منهم بأنه محترم

ولا فاتك شوية شباب فاضي مبيعملش اي حاجة غير انه ينقض الدين او اي اعتراض علي تصرفاتهم الخاطئة بالسب أو الردود المقززة المستفذة

وفاتك أن مفيش راجل متجوز إلا إذا كان ضحك علي واحدة علي الأقل قبل اىلجواز وعاش معاها قصة حب وفي الأخر يقولها كل شئ قسمة ونصيب وخلينا أخوات ....؟؟

فاتك مشهد دموع البنات الغلابة علي حب كانوا فاكرينه صادق

فاتك مشهد الي بيبقي معهوش وأول ما يبقي معاه وربنا يكرموا يدوس علي الي كانوا زيوا

فاتك مشهد البنت الي بتتقلب 180 درجة لمجرد أنها اتخطبت وكأنها جابت الديب من ذيله .... علي أيه مش عارفه ؟؟؟

فاتك فضايح الشرطة ومجلس الشوري ومجلس الشعب وصورهم وهما بيرفعوا الجذم علي بعض ويطلعوا لسانهم

بيتهيألي أني فاتني انا وأنتي كتير نكتبه لكن شوفنا أكتر وأكتر

معتقدش ان الي بيرفضوا أنهم يساعدوا بعض يبقوا شعب كويس

أنا مبقولش أننا وحشين بس احنا فينا أكتر من 75 % زي الزفت
ربنا يحرصنا ويحمينا ومنبقاش وحشين في يوم من الأيام

شكرا يا منولة علي موضوعاتك الجامدة

DODY

هو احنا شعب وحش؟

هو احنا شعب وحش؟

رد: هو احنا شعب وحش؟

رد: هو احنا شعب وحش؟

رد: هو احنا شعب وحش؟